🇨🇦 「新移民必睇」加拿大垃圾分類懶人包！否則會俾人罰錢！

喺香港扔垃圾看似一件簡單不過嘅事，但去到加拿大就要一改常態，喺加拿大扔垃圾都有學問㗎～😱一定要學識垃圾分類及回收，更加要記得咩日子應該扔邊類垃圾，否則有機會被人罰錢架！加拿大每個省份和城市都有各自的垃圾分類制度，可能會有一些細節差異，今次等小編分享一下安省（多倫多）需要注意嘅事項啦！

安省垃圾桶「顏色分類」

安省的垃圾桶與香港一樣都有顏色分類及垃圾分類：

🔵藍色垃圾桶 (Blue Bin)：可回收物品

用於收集可回收的垃圾，包括紙張、玻璃、塑膠、鋁罐、紙製品等。

🟢綠色垃圾桶 (Green Bin)：廚餘

用於收集廚餘、食物相關垃圾，包括水果蔬菜殘渣、茶葉咖啡渣、肉骨、魚骨、紙餐巾、紙碟、尿片等。

*記得呢種垃圾需裝入可降解塑膠袋內之後自放入垃圾桶呀！

⚫️黑色垃圾桶 (Black Bin)：不可回收垃圾

用於收集不可回收的一般垃圾，包括被污染的塑膠製品、塑膠袋、包裝紙等。

*但有害垃圾如電池、燈泡、舊手機等就需要另外處理，唔好直接扔呀！

其他垃圾處理小Tips：

🍃園林廢物：例如樹葉、樹枝、盆栽植物等，通常每兩個星期收一次。

🍳剩餘食用油：唔好直接倒落去水槽或馬桶，否則好易堵塞管道。最好等到油脂變硬，之後再刮入綠色垃圾桶。

📺大型垃圾：一些大型垃圾如電視機、廚房設備、梳化等，會有特別收集時間表，唔好亂放出去呀！

如果你有垃圾唔識分類點算？

唔使驚！其實依家加拿大不同城市都會推出手機App專門幫助市民，例如溫哥華有「Recycle BC」，而多倫多就有「TOwaste」。App主要想方便市民更清楚地知道垃圾站的位置、時間表以及各種垃圾回收的分類資訊，甚至有提醒功能通知當天會回收邊一類垃圾，咁就唔會錯過扔垃圾嘅時機，超方便！

扔錯垃圾桶點算？

最後提提大家，如果你扔錯垃圾桶，工作人員係有權拒收你的垃圾，仲會喺你個垃圾桶貼封條，提醒返你自己重新分類㗎！如果多次犯錯仲要被市政府罰款，千祈唔好以為係小事呀！😨

加拿大好重視環保，一直強烈鼓勵分類垃圾，分類廢物對於減輕環境污染非常重要。以上小編提供嘅資料主要針對安省（多倫多），記得睇清楚自己住嘅城市所採用的回收規則，避免出錯啦！💪🏻🌎